Archana Patil Chakurkar: अर्चना पाटील चाकूरकर गेल्या अनेक वर्षांपासून भाजपमध्ये प्रवेश करणार असल्याची चर्चा सुरु आहे. मात्र काही ना काही कारणास्तव प्रवेशास उशीर झाला आहे. आता पुन्हा एकदा अर्चना पाटील चाकूरकर यांच्या भाजप प्रवेशाची चर्चा जोरात सुरू झाली आहे.
आज दि. 29 रोजी काँग्रेसचे ज्येष्ठ नेते आणि माजी केंद्रीय गृहमंत्री शिवराज पाटील यांची सून अर्चना पाटील चाकूरकर यांनी भाजप नेते आणि उपमुख्यमंत्री देवेंद्र फडणवीस यांची भेट घेतली. त्या उद्या मुंबईत भाजपमध्ये प्रवेश करण्याची शक्यता आहे.
गेल्या महिन्यात खासदार अशोक चव्हाण यांनी भाजपमध्ये प्रवेश केल्याने ते राज्यसभेवर गेले. आता अशोक चव्हाण यांनी मध्यस्थी केली आहे. त्यामुळे आणखी एक मोठे नाव आणि काँग्रेसचा नेता भाजपकडून गळाला लागण्याची शक्यता आहे. माजी केंद्रीय गृहमंत्री शिवराज पाटील चाकूरकर यांच्या सून अर्चना पाटील चाकूरकर या भाजपच्या वाटेवर असल्याचे वृत्त आहे. अशोक चव्हाण, बसवराज पाटील यांच्यानंतर आता अर्चना पाटील चाकूरकरही भाजपमध्ये प्रवेश करणार आहेत. त्यामुळे मराठवाड्यातून भाजपमध्ये प्रवेश करणाऱ्या नेत्यांची संख्या दिवसेंदिवस वाढत आहे.
मराठवाड्यात काँग्रेसची पडझड सुरूच
काँग्रेसचे ज्येष्ठ नेते आणि माजी गृहमंत्री शिवराज पाटील चाकूरकर यांच्या सून डॉ. अर्चना पाटील चाकूरकर येत्या काही दिवसांत भाजपमध्ये प्रवेश करणार असल्याचे विश्वसनीय वृत्त आहे. मराठवाड्याचे नेते अशोक चव्हाण यांनी भाजपमध्ये प्रवेश केल्यानंतर मराठवाड्यातील काँग्रेस कार्यकर्त्यांमध्ये अस्वस्थता पसरली आहे. काही दिवसांनी शिवराज पाटील चाकूरकर यांचे मानस पुत्र माजी राज्यमंत्री बसवराज पाटील मुरुमकर यांनीही भाजपमध्ये प्रवेश केला. काँग्रेसमधील अनेक दुफळीच्या व गट तटाच्या राजकारणात अशोक चव्हाण यांचा गट नेहमीच चाकूरकर गटाशी जोडलेला होता. आगामी काळात मराठवाड्यात काँग्रेसमध्ये देशमुख गटाचेच वर्चस्व राहणार आहे. या सर्व बाबींचा विचार करता अर्चना पाटील चाकूरकर यांनी आपले राजकीय अस्तित्व टिकवण्यासाठी भाजपची वाट धरल्याचे बोलले जात आहे.
अशोक चव्हाण यांच्या भाजप प्रवेशामुळे मराठवाड्यातील लातूर परिसरात काँग्रेसमध्ये केवळ देशमुख कुटुंबीयांचे वर्चस्व अबाधित राहिले आहे. दरम्यान, चाकूरकर कुटुंबाचा चव्हाण कुटुंबाशी नेहमीच एकोपा राहिला आहे. त्यामुळे आता अर्चना पाटील यांना भाजपमध्ये घेण्यासाठी चव्हाण आणि पाटील जोरदार प्रयत्न करत असल्याचे दिसून येत आहे. त्यामुळे त्यांना लातूर शहर विधानसभा मतदारसंघातून भाजपकडून संधी दिली जाऊ शकते.
Archana Patil Chakurkar, daughter-in-law of senior Congress leader and former Union Home Minister Shivraj Patil meets BJP leader and Deputy CM Devendra Fadnavis. She is likely to join the BJP tomorrow in Mumbai. pic.twitter.com/pDcBREodez
— ANI (@ANI) March 29, 2024
शिवराज पाटील चाकूरकर यांचा प्रतिक्रिया देण्यास नकार
काँग्रेसचे ज्येष्ठ नेते शिवराज पाटील चाकूरकर यांचे पुतणे बसवराज पाटील मुरुमकर यांनी भाजपमध्ये प्रवेश केल्यानंतर शिवराज पाटील चाकूरकर यांनी कोणतीही प्रतिक्रिया दिली नाही. चाकूरकर यांची सून अर्चना पाटील याही भाजपमध्ये प्रवेश करणार असल्याची चर्चा जोर धरू लागली आहे. याबाबत चाकरकर गटाकडूनही कोणतीही प्रतिक्रिया आलेली नाही. या सर्व कारणांमुळे आमदार अमित देशमुख यांनी लातूर लोकसभेचा उमेदवार निवडताना जातीय समीकरणाकडे लक्ष दिले.
लोकसभेसाठी काँग्रेसकडून लिंगायत उमेदवार
लिंगायत समाजाचे उमेदवार डॉ.शिवाजीराव काळगे यांना उमेदवारी देण्यात त्यांना यश आले आहे. लोकसभा निवडणुकीच्या प्रचारापूर्वी कार्यकर्त्यांच्या भेटीगाठी व संवाद साधण्याची प्रक्रिया त्यांनी काही दिवसांपूर्वी सुरू केली आहे. देशमुख गटाने या निवडणुकीत उमेदवारी देताना जाणीवपूर्वक शिवराज पाटील चाकूरकर यांना डावलून डॉ. काळगे उमेदवारी दिली आहे. पक्ष पातळीवरून आम्ही चाकूरकर यांना गृहीत धरलेले नाही, असा इशारा देशमुख गटाने दिला आहे.
मागील काही महिन्यात चाकूरकर यांना डावलले जात असल्याचे दिसून येत आहे. यावरून जिल्ह्याचे बदलते राजकारण कोणत्या वळणावर जाणार आहे, याची प्रचीती येऊ लागली आहे. गेल्या वीस वर्षांपासून त्या प्रत्येक विधानसभा निवडणुकीत लढणार असल्याची चर्चा होते, आता त्यांच्या भाजप प्रवेशाच्या चर्चेला पुन्हा एकदा जोर आला आहे. लातूर शहर विधानसभा मतदारसंघातून त्या भाजपच्या उमेदवार असतील अशीही माहिती समोर आली आहे.
लोकसभा निवडणुकीच्या पार्श्वभूमीवर भाजपने अब की बार, 400 पार असा नारा दिला आहे. त्यामुळे महायुतीने महाराष्ट्रातून 45 हून अधिक जागांवर उमेदवार निवडून आणण्याचा संकल्प केला आहे. त्यामुळेच मोदींना तिसऱ्यांदा पंतप्रधान करण्यासाठी महाराष्ट्रातून जास्तीत जास्त खासदार निवडून आणण्याचे राजकारण भाजप सध्या खेळत आहे. अनेकांची नाराजी पाहता भाजप काँग्रेससह अन्य पक्षांच्या नेत्यांना भाजपमध्ये संधी देत आहे.
