18 महिलांवर बलात्कार, 32 वर्षे खटला; देशाला हादरवून सोडणाऱ्या या खटल्यात मिळाला अखेर न्याय

Vachathi-case

मुंबई : तामिळनाडूमध्ये एकाच प्रकरणात आरोपी असलेल्या 215 सरकारी अधिकारी आणि कर्मचाऱ्यांना आता एकत्र तुरुंगवास भोगावा लागणार आहे. तामिळनाडूमध्ये एकाच दिवशी 18 महिलांवर बलात्कार झाल्याची ही घटना आहे. याप्रकरणी न्यायालयाने आता निर्णय दिला आहे. 1992 मध्ये तामिळनाडूच्या वच्छी गावात एकाच दिवसात 18 महिलांवर बलात्कार झाला होता.

मद्रास हायकोर्टाने आता या प्रकरणात सर्व 215 सरकारी अधिकारी आणि कर्मचाऱ्यांची शिक्षा कायम ठेवली आहे. सत्र न्यायालयाकडून त्यांना ही शिक्षा सुनावण्यात आली. वाचठी गावात बलात्कार, प्राणघातक हल्ला, मालमत्तेचे नुकसान, गोवंश हत्या इत्यादी गुन्ह्यांसाठी दोषी ठरलेल्या 215 सरकारी कर्मचाऱ्यांमध्ये काही वर्ग I अधिकारी आहेत. मद्रास उच्च न्यायालयाच्या निकालापूर्वी सत्र न्यायालयाने या प्रकरणात 5 महसूल अधिकार्‍यांसह 126 वन विभागाचे कर्मचारी, 84 पोलीस कर्मचारी आणि 4 आयएफएस अधिकार्‍यांना दोषी ठरवले होते.

मद्रास उच्च न्यायालयाचे न्यायमूर्ती पी वेलमुरुगन यांनी शुक्रवारी 29 सप्टेंबर रोजी या प्रकरणी निकाल दिला. सरकारी कर्मचार्‍यांनी बलात्कार केलेल्या 18 महिलांना प्रत्येकी 10 लाख रुपये नुकसानभरपाई देण्याचे आदेशही उच्च न्यायालयाने दिले. बलात्कारात दोषी आढळलेल्या सर्वांकडून नुकसानभरपाईच्या रकमेपैकी 50 टक्के रक्कम वसूल करावी, असा आदेशही न्यायाधीशांनी दिला.

तसेच सर्व दोषींना 1 ते 10 वर्षांपर्यंतच्या कारावासाची शिक्षा सुनावण्यात आली आहे. यासोबतच मद्रास उच्च न्यायालयाने वच्छी गावातील लोकांवरील तस्करीचे आरोपही फेटाळून लावले आहेत. न्यायमूर्ती पी वेलमुरुगन म्हणाले, सर्व फौजदारी अपील फेटाळण्यात आले आहेत. सरकारने प्रत्येक बलात्कार पीडितेला 10 लाख रुपये नुकसानभरपाई द्यावी. जर पीडिता जिवंत नसेल तर त्याच्या कुटुंबाला नुकसान भरपाई मिळावी.

बलात्काराच्या दोषींकडून 50 टक्के भरपाई वसूल करावी. पीडितांना स्वयंरोजगार किंवा इतर कोणत्याही माध्यमातून योग्य नोकऱ्याही दिल्या पाहिजेत. तत्कालीन जिल्हाधिकारी, पोलीस अधीक्षक आणि जिल्हा वनअधिकारी यांच्यावर कठोर कारवाई करावी, असे ते म्हणाले.

काय आहे वाचठी प्रकरण?

ही घटना 20 जून 1992 रोजी घडली. तामिळनाडूच्या वन आणि महसूल विभागाला चंदनाचे लाकूड कापून तस्करी होत असल्याची माहिती मिळाली होती. या माहितीच्या आधारे तामिळनाडूतील धर्मपुरी जिल्ह्यातील वच्छी गावात छापा टाकण्यात आला.

या काळात तामिळनाडू वन आणि महसूल विभागाच्या तत्कालीन अधिकारी आणि कर्मचाऱ्यांनी 18 महिलांवर बलात्कार केला होता. अनेक आदिवासींची घरे उद्ध्वस्त झाली. त्यांची मालमत्ता नष्ट झाली आणि गुरेढोरेही मारले गेले. दरम्यान, 32 वर्षे चाललेल्या या खटल्यातील आरोपींना आता तुरुंगवासाची शिक्षा झाली आहे.